काठमाडौं महानगरपालिकाले रानीपोखरीको ऐतिहासिक उद्घाटन भए पनि निर्माण गर्न बाँकी रहेका कामलाई चरणबद्ध रूपमा अगाडि बढाउने भएको छ ।
महानगरपालिकाका मेयर विद्यासुन्दर शाक्यले रानीपोखरी गुरुयोजनाअनुसारको निर्माणका लागि धेरै काम बाँकी रहेकोले चरणबद्ध रूपमा निर्माण गरिने बताए ।
रानीपोखरीको मुख्य प्रवेशद्वार र ऐतिहासिक पाटीलगायतका संरचनाको निर्माण गर्न बाँकी रहेको छ ।
त्यस्तै, गुरुयोजनाअन्तर्गत त्रि–चन्द्र कलेज, प्रहरी आयुक्तको कार्यालय, शान्तिबाटिका, रत्नपार्कलगायतलाई समावेश गरी बृहत् रानीपोखरीको रूरुपमा विकास गरिने मेयर शाक्यले बताए ।
यी कामहरू एकैसाथ गर्नेभन्दा पनि चरणबद्ध रूपमा अगाडि बढाउने रणनीतिअनुसार काम भइराखेको पनि उनले बताए ।
०७२ को भूकम्पका कारण क्षतिग्रस्त रानीपोखरी पुनर्निर्माणको क्रममा आधुनिक शैलीमा बनाउन लागिएको भन्दै विवाद भएको थियो ।
तर, पछि विज्ञहरूको सुझाबअनुसार भूकम्प अघि गुम्बज शैलीमा रहेको बालगोपालेश्वरको मन्दिर प्रताप मल्लको पालामा बनाइको ग्रन्थकुट (शिखर) शैलीमा पुनर्निर्माण गरिएको छ ।
रानीपोखरीको मुख्य पोखरी र बालगोपालेश्वर मन्दिरको कामबाहेक महानगरपालिकाले बनाएको गुरुयोजनाअनुसार बृहत् रानीपोखरीको विकास गर्न भने बाँकी छ ।
मेयर शाक्यका अनुसार रानीपोखरी विस्तारको काम सम्पन्न भइसकेपछि खुलापार्कको रूपमा नागरिकको लागि खुला हुनेछ ।
पोखरीको बीचमा रहेको बालगोपालेश्वर मन्दिर भने भाइटीकाको दिन मात्रै खुल्नेछ ।