स्याङ्जामा प्रहरीले दुई सय १८ गोलिया सालको काठ बरामद गरेको छ । चापाकोट नगरपालिका– १ खोलेगाउँस्थित भित्री सडकखण्डस्थित जंगलमा बेवारिसे अवस्थामा रहेको सालको काठ बरामद गरिएको जिल्ला प्रहरी कार्यालय स्याङ्जाका सूचना अधिकारी डिएसपी राजेन्द्रप्रसाद अधिकारीले जानकारी दिए ।
बाटोमुनि स्याउलाले छोपी लुकाइछिपाई राखेको अवस्थामा रहेको तीन सय ३४ क्युफिटबराबरको दुई सय १८ गोलिया सुकेको चारपाटा हानेको साल जातको काठ बरामद गरिएको अधिकारीले बताए ।
डिएसपी अधिकारीका अनुसार बरामद गरिएको काठ स्थानीय, जनप्रतिनिधि र वन कार्यालयका कर्मचारीको रोहवरमा बरामदी मुचुल्का गरी आवश्यक कारबाहीका लागि सबडिभिजन वन कार्यालय चापाकोटलाई बुझाइएको छ । घटनाको सम्बन्धमा थप अनुसन्धान भइरहेको छ ।