ताप्लेजुङका प्रमुख जिल्ला अधिकारी झरेन्द्रप्रसाद चापागाईंलाई कोरोना संक्रमण पुष्टि भएको छ ।
प्रजिअलाई कोरोना पजिटिभ भएपछि जिल्ला प्रशासन कार्यालय सात दिनलाई सिल गरिएको छ ।
प्रशासन सात दिनलाई बन्द गरिने तथा प्रजिअका सम्पर्कमा आएका सबैको पिसिआर परीक्षणसमेत गरिने प्रशासनका नायव सुब्बा रमेशप्रसाद सिग्देलले बताए ।
ओलाङ्चुङगोलामा स्थापना हुने बिओपी उद्घाटनका क्रममा पर्यटनमन्त्री योगेशकुमार भट्टराईसँगै एउटै हेलिकोप्टरमा सवार चापागाईंलाई संक्रमण पुष्टि भएको हो ।
बिओपी उद्घाटनको कार्यक्रम सकेर फर्किएको भोलिपल्ट देखिएको हल्का ज्वरोका आधारमा प्रजिअ चापागाईंको स्वाब संकलन गरी परीक्षणका लागि विराटनगर पठाइएको थियो ।
स्वाब संकलनपछि प्रजिअ चापागाईं प्रशासन कार्यालयकै आवास कक्षको क्वारेन्टिनमा बसेका थिए ।
उनले आफ्नो स्वाब परीक्षणको रिपाेर्ट पजिटिभ आएकाले थप सतर्कताका साथ आइसोलेसनमा रहने बताए ।