कोरोना संक्रमणका कारण बाग्लुङमा थप एकजना पुरुषको मृत्यु भएको छ । बाग्लुङ नगरपालिका– २ का ७७ वर्षीय पुरुषको कोरोना संक्रमणका कारण बुधबार चरक मेमोरियल अस्पताल पोखरामा निधन भएको हो ।
उच्च रक्तचाप र मुटुको समस्या रहेका उनलाई स्वास्थ्यमा समस्या देखिएपछि गत आइतबार थप उपचारका लागि पोखरा लगिएको थियो । उपचारका क्रममा पोखरा लगिएका उनको कोरोनाका कारण मृत्यु भएको गण्डकी प्रदेश स्वास्थ्य निर्देशनालयका निर्देशक विनोदबिन्दु शर्माले जानकारी दिए ।
उनी विगत लामो समयदेखि बाग्लुङ बजारमा किराना व्यवसाय गर्दै आएका थिए । योसँगै जिल्लामा कोरोनाका कारण मृत्यु हुनेको संख्या दुई पुगेको छ । गण्डकी प्रदेशमा कोरोनाका कारण मृत्यु हुनेको संख्या ४६ पुगेको स्वास्थ्य निर्देशनालय पोखराले जनाएको छ ।