कोरोनाको संक्रमण उच्च हुँदै जाँदा पछिल्लो समय काठमाडौं उपत्यका सबैभन्दा उच्च जोखिममा परेको छ । उपत्यकामा संक्रमण दर निकै उच्च हुँदै गएको छ ।
काठमाडौं उपत्यकामा कुल एक सय ८१ आइसियू रहेका छन् जसमध्ये ८२ वटा आइसियू अहिले प्रयोगमा रहेको स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले जानकारी दिए । यो कुल आइसियूको ४५.३ प्रतिशत हो ।
त्यसैगरी काठमाडौं उपत्यकामा कुल ७६ वटा भेन्टिलेटर रहेका छन् । जसमा २७ वटा अहिले प्रयोग भइरहेका छन् । यो कुल भेन्टिलेटरको ३५.५ प्रतिशत हो ।
मन्त्रालयका प्रवक्ता डा. गौतमले उपत्यकाबाहिरबाट काठमाडौं उपत्यका आएकाहरू १४ दिन क्वारेन्टिनमा बसेर मात्र कार्यालय तथा काममा जान आग्रह गरेका छन् ।
उपत्यकामा तीव्र गतिमा संक्रमण फैलिएको भन्दै उनले सबैले मापदण्ड पालना नगरेमा स्थिति गम्भीर हुन सक्नेप्रति सबैले मनन गरिदिन आग्रह पनि गरे ।