चाडपर्व नजिकिँदै गर्दा काठमाडौंका मुख्य व्यापारिक क्षेत्रहरू सुनसान देखिएका छन् । दसैँ, तिहार, छठलगायतका ठूला चाडपर्व नजिकिँदै गए पनि काठमाडौं उपत्यकाका प्रमुख व्यापारिक बजारमा चहलपहल कम देखिएको छ । विगतका वर्षहरूमा दसैँ नजिकिएसँगै भिड हुने बजारमा यस वर्ष कोभिड–१९ संक्रमणको जोखिमका कारण सुनसान देखिएको हो ।
मंगलबार साँझ न्युरोड, दरबारमार्ग, ठमेललगायतका बजारमा पुग्दा केही पसल खुलेको देखिए पनि अधिकांश पसल बन्द भइसकेका थिए । सामान खरिद गर्न जानेहरूरु निकै न्यून देखिएका थिए । खासगरी लत्ताकपडा, घरायसी सामग्री, मोबाइल फोन, टेलिभिजनलगायतका बजारमा सुनसान देखिएका छन् ।
विगतमा चाडपर्वको समयमा निकै भिड हुने क्षेत्र यसपटक सुनसान हुँदा व्यापारीहरू पनि निराश बनेका छन् । न्युरोड, दरबारमार्ग र ठमेल त्यसै पनि साँझको समयमा निकै भिड हुने बजार हुन् । तर, यस वर्ष कोभिड– १९ को संक्रमणको जोखिमका कारण मानिस सामान खरिद गर्न बजार निस्किएका छैनन् ।
ठमेल क्षेत्रमा आन्तरिक ग्राहकभन्दा पनि पर्यटक किनमेलका लागि बढी आउने क्षेत्र हो । पर्यटकीय क्षेत्र भए पनि यस वर्ष पर्यटक नै देख्न पाइँदैन । त्यसैले पर्यटकलाई लक्षित गरी खोलिएका पसल पनि प्रायः बन्द हुने गरेको देखिएको छ । कोभिडका कारण उपभोक्ता नभएपछि व्यापारिक क्षेत्र सुनसान मात्रै भएको छैन, यसको असर समग्र अर्थतन्त्रमा समेत पर्ने देखिएको छ ।