- वि.सं २०८१ बैशाख १३ बिहीबार
५ नम्बर प्रदेशका मुख्यमन्त्री शंकर पोखरेलले प्रदेशको राजधानीसम्बन्धी प्रस्तावमाथि आगामी सोमबारबाट प्रदेश सभामा छलफल हुने बताएका छन् ।
प्रदेश सरकारले अर्घखाँचीको शीतगंगा नगरपालिका तथा दाङको राप्ती र गरुडा गाउँपालिकाभित्र पर्ने गरी भालुवाङमा प्रदेशको राजधानी राख्ने निर्णय गरेपछि नयाँ पत्रिकासँग संक्षिप्त कुरा गर्दै पोखरेलले सोमबारबाट प्रदेश सभामा छलफल अघि बढ्ने जानकारी दिएका हुन् । सरकारले शुक्रबारै प्रदेश सभामा राजधानीको प्रस्ताव छलफल दर्ता गरिसकेको छ ।
‘राजधानीसम्बन्धी प्रस्तावमाथि छलफल गर्न सोमबार प्रदेश सभा बैठक बस्छ, त्यहीँ प्रक्रियाअनुसार छलफल भएर अन्तिम निर्णय हुन्छ,’ पोखरेलले भने ।
प्रदेश ५ को राजधानी दाङ कि बुटवल भन्नेमा नेकपा र कांग्रेसका प्रभावशाली नेताहरू नै विभाजित रहेका कारण लामो समयदेखि टुंगो लाग्न सकेको थिएन । तर, नेकपाका अध्यक्षद्वय केपी ओली र पुष्पकमल दाहाल प्रचण्डबीच गत मंगलबार भएको सहमति, प्रदेश सरकारको प्रस्ताव र प्रदेश सभाको प्रक्रियाबाट बढीमा तीन–चार दिनभित्रै प्रदेश ५ को राजधानी टुंगो लाग्ने भएको छ ।
नेकपाको प्रदेश ५ को इन्चार्ज पोखरेलले अध्यक्षहरूबीच समझदारीलगतै राजधानीको विवाद टुंगो लाग्ने बताउँदै आएका थिए । यसअघि बागमती प्रदेशको राजधानी पनि ओली र प्रचण्डको समझदारीपछि हेटौँडा टुंगो लागेको थियो ।
