नेप्सेमा गिरावट, जलविद्युतकाे वृद्धिले पुगेन टेवा
१५ कारोबार दिनमा जलविद्युतमा ८६ प्रतिशतसम्म कमाए
मंगलबार पनि सेयर बजार परिसूचक नेप्से घटेको छ । कारोबारको केही समयदेखि नै घट्न थालेको सूचक बजार बन्द हुँदासम्म सुधार हुन सकेन । नेप्से सात दशमलव २१ अंकले घटेर एक हजार पाँच सय ५३ मा आइपुगेको हो ।
कारोबार रकममा भने मंगलबार सामान्य वृद्धि भएर एक अर्ब ८२ करोड पुगेको छ । अघिल्लो दिन एक अर्ब ६९ करोड रुपैयाँको कारोबार भएको थियो । सर्वसाधारणले सजिलै किनबेच गर्न सक्ने सेयरहरूको सूचक फ्लोट र ‘क’ वर्गका कम्पनीहरूको मात्र सेयर मापक सूचक सेन्सेटिभ परिसूचक दुवै घटेका छन् । कारोबारमा आएकामध्ये जलविद्युत्, उत्पादनमूलक र सामूहिक लगानी कोष समूहगत परिसूचक मात्र वृद्धि भएको छ । तर, यो वृद्धिले पनि नेप्सेलाई बढाउन सकेन ।
अंकित मूल्यभन्दा पनि तल पुगेका जलविद्युत् कम्पनीमा लगानी गरेर १५ कारोबार दिनमै चार प्रतिशतदेखि ८६ प्रतिशतसम्म नाफा पाएका छन् । सूचीकृत ३४ वटा जलविद्युतमा १४ वटाको ५० प्रतिशतभन्दा धेरैले मूल्य वृद्धि भएको छ ।
कम मूल्य रहेको कारण लगानीकर्ताहरू यो समूहमा आकर्षित देखिँदै आएका थिए । १० कम्पनीको मूल्य दुई सयभन्दा माथि पुगिसकेको छ । त्यस्तै, दुईवटाबाहेक सबै कम्पनीको मूल्य एक सय रुपैयाँ माथि छ । हालै सूचीकृत लिबर्टी इनर्जीको मात्रै आठ दिन कारोबार भएको छ । यसमा लगानीकर्ताहरूले गुमाइरहेका छन् ।
प्राथमिक सेयर बजारमा लगानी गरेकाहरू भने मुनाफामै छन् । कतिपय यो समूहका कम्पनी नोक्सानमा नै रहे पनि लगानीकर्ताहरू यसैमा खेलिरहेका छन् ।
मंगलबार बजारमा कारोबारमा आएकामध्ये ५८ कम्पनीको मूल्य बढेको, एक सय दुईवटाको घटेको र १० वटाको स्थिर रहेको छ ।
नेपाल लुब आयल लिमिटेडले १० प्रतिशत नगद लाभांशको प्रस्ताव ५ कात्तिकमा हुने २९औँ साधारण सभामा लैजाँदै छ । कम्पनीले जारी पुँजी तीन करोडबाट बढाएर पाँच करोड पुर्याउने प्रस्तावसमेत लैजाँदै छ । कम्पनीको बजारमा खासै सेयर किनबेच छैन । आइतबार र सोमबार लगातार कारोबार भएको अन्तिम मूल्य एक सय ९० रुपैयाँ छ ।