मोरङको उर्लाबारी नगरपालिका– ७ मा रहेको एक होटेलका सञ्चालकले कुटपिट गर्दा ग्राहकको मृत्यु भएको छ ।
युनिक होटेलका सञ्चालक २६ वर्षीय गोपाल तामाङले कुटपिट गर्दा होटेलमा खाजा खान आएका एक युवकको मृत्यु भएको हो ।
आइतबार राति मादक पदार्थ सेवन गरी श्रीमतीसहित होटेलमा पुगेका ३५ वर्षीय सुशील मल्लिकको कुटपिटबाट मृत्यु भएको जिल्ला प्रहरी कार्यालय मोरङका एसपी सन्तोष खड्काले जानकारी दिए ।
संखुवासभा घर भएका होटेल सञ्चालक तामाङ उर्लाबारीमा होटेल सञ्चालन गरेर बसेका थिए ।
उनले होटेलमा आएका मल्लिकलाई आइतबार राति ११ः३० बजेतिर कुटपिट गरेर घाइते बनाएको प्रहरीले जनाएको छ ।
प्रहरीका अनुसार बाहिरैबाट मादक पदार्थ सेवन गरेर होटेलमा श्रीमती कञ्चनसहित पुगेपछि विवाद हुँदा तामाङले कुटपिट गर्दा होटेलमै मल्लिक बेहोस भएका थिए ।
होटेलमै बेहोस भएका मल्लिकको टाउकोमा चोट लागेको थियो । उनलाई उपचारका लागि उर्लाबारीको गोदावरी अस्पतालमा भर्ना गरिएको थियो ।
गोदावरीमा उपचार हुन नसकेपछि सोमबार बिहान झापाको बी एन्ड सी अस्पताल लगिएको प्रहरीले जनाएको छ ।
बी एन्ड सीले पनि उपचार सम्भव नहुने जनाउँदै भारतको सिलिगुडी रिफर गरेको थियो ।
मल्लिकको सिलिगुडीमा उपचारका क्रममा सोमबार राति उपचारकै क्रममा मृत्यु भएको एसपी खड्काले बताए ।
भारतको दार्जिलिङ घर भएका सुशीलले विगत केही वर्ष अघिदेखि विभिन्न बजारहरूमा सुनका गहना बनाउने काम गर्ने गरेका थिए ।
प्रहरीले कुटपिटमा संलग्न होटेल सञ्चालक तामाङलाई नियन्त्रणमा लिएर घटनाको अनुसन्धान सुरु गरेको छ ।