सरकारले नक्सालस्थित नेपाल बाल संगठन परिसरमा रहेका दुई विद्यालयलाई स्थानान्तरण गर्ने निर्णय गरेको छ । संगठनको जग्गामा रहेको आधारभूत आदर्श विद्यालय र केन्द्रीय बहिरा उच्च माविलाई अन्यत्र स्थानान्तरण गरिने भएकाे हाे ।
त्यहाँ नयाँ संरचना बनाई बाल मन्दिरमा रहेका बालबच्चाहरूका लागि सुरक्षित र उपयुक्त आवासको व्यवस्था गरिने परराष्ट्रमन्त्री एवं सरकारका प्रवक्ता प्रदीप ज्ञवालीले जानकारी दिए। त्यसका लागि बाल संगठनलाई डेढ करोड रुपैयाँ दिने निर्णय भएको छ ।
प्रवक्ता ज्ञवालीले दिएकाे जानकारीअनुसार मन्त्रिपरिषद्ले संगठनको नाममा रहेको सम्पत्ति अद्यावधिक गर्ने निर्णय पनि गरेको छ । बाल संगठन परिसरमा रहेको वृहस्पति विद्यासदनसँग पनि प्रतिस्पर्धाविना भएको सम्झौताको छानबिनका लागि नयाँ कार्यसमितिले माग गरेको छ ।
सरकारले बाल संगठनमा भएको अनियमितताको छानबिन गरी पुरानो कार्यसमितिलाई हटाएर हालै नयाँ कार्यसमिति गठन गरेको छ । नयाँ कार्यसमितिले संगठनको सबै सम्पत्तिको खोजी र सदुपयोगको प्रक्रिया सुरु गरेको छ ।
केन्द्रीय कार्यालय परिसरभित्रको वृहस्पति विद्यासदनलगायत देशैभरिका सम्पूर्ण चलअचल सम्पत्तिको उपभोग कौडीको भाउमा गरिएकाले सम्पूर्ण लिज सम्झौताहरू आवश्यकताअनुसार खारेजी र पुनरावलोकन गरी बाल संगठनको गुमेको साख फिर्ता गराउन बाल संगठनको वर्तमान कार्यसमिति अघि बढेको महासचिव समीरकुमार बडालले बताए ।