लमजुङको मर्स्याङ्दी गाउँपालिका-८ भुष्मेमा केही वर्षअघि बाँझो रहेका जग्गा यतिवेला तरकारी खेतीले हरियाली भएका छन् । भुष्मेका अधिकांश कृषक तरकारी खेतीमा लागेका छन् । किसानले काउली, बन्दा, गोलभेंडालगायतका तरकारीको खेती गरेका छन् ।
यसअघि तरकारी किन्दै आएका स्थानीयले अहिले घरैपिच्छे तरकारी लगाएका छन् । स्थानीय विष्णुमाया तामाङका अनुसार गाउँका ५५ घरपरिवार नै तरकारी खेतीमा व्यस्त छन् ।
‘पहिले किनेर काम चलाउने गरेका थियौँ अहिले आफैँले गर्नुपर्छ भन्ने बुझेपछि घरघरमा टनेल बनाएका छौँ,’ उनले भनिन्, ‘आफैँले तरकारी फलाउन थालेपछि आफूलाई खान र बिक्री गरेर २–४ पैसा आम्दानी गर्न सजिलो भएको छ ।’
स्थानीय होमराज तामाङले अहिले सिंगो गाउँ नै तरकारीमा आत्मनिर्भर भएको बताए । उनले भने, ‘कोरोनाको महामारीका समयमा गाउँका सबै किसान तरकारी खेतीमा व्यस्त छन् । गाउँलेको दैनिकी तरकारी खेतीमै बित्ने गरेको छ ।’
०७१ सालेदखि तरकारी खेती गर्दै आएकी नीलमाया तामाङले आठ रोपनी जग्गामा अहिले व्यावसायिक तरकारी खेती गरेकी छिन् । उनले ५/६ वटा टनेल निर्माण गरी मौसमी तथा बेमौसमी तरकारी खेती गर्दै आएको बताइन् । उनले भनिन्, ‘पहिलेका दिनमा दुई–चार पैसा देख्न पनि रहरै हुन्थ्यो, अहिले त महिनामा नै ५० हजार आम्दानी हुन्छ ।’