धरान उपमहानगरपालिकाले अनलाइन कर भुक्तानी सेवा सुरु गरेको छ ।
अब घरबाटै वा संसारको जुनै ठाउँबाट पनि अनलाइनमार्फत कर तथा राजस्व तिर्न सकिने भएको छ ।
यो प्रणाली नेपालमै पहिलोपटक धरान उपमहानगरपालिकाले लागू गरेको उपमहानगरका सूचना अधिकृत खगेन्द्रप्रसाद खतिवडाले जानकारी दिए ।
उपमहानगरमा जनता आफैँ उपस्थित भएर कर तिर्न कोरोनाको जोखिमलाई मध्यनजर गरी १ असोजदेखि अनलाइन सेवा सुरु गरिएको अधिकृत खतिवडाले बताए ।
मेयर तिलक राई र उपमेयर मञ्जु भण्डारीको घरजग्गाको कर अनलाइनमार्फत तिरेर औपचारिक रूपमा सुरुवात गरिएको थियो ।