कोरोना संक्रमित एक ३५ वर्षीय पुरुषको धरानको बिपी कोइराला स्वास्थ्य विज्ञान प्रतिष्ठान धरानमा बुधबार बिहान निधन भएको छ ।
उनी सप्तरी खडक नगरपालिकाका बासिन्दा रहेको अस्पतालका प्रवक्ता डा. निदेश सापकोटाले जानकारी दिए ।
उनी पहिलेदेखि नै मिर्गाैलासम्बन्धी र उच्चरक्तचापजस्ता दीर्घरोगबाट पीडित बनेको र राजविराजस्थित गजेन्द्रनारायण सिंह अस्पतालबाट कोरोना संक्रमण देखिएपछि रिफर भएर प्रतिष्ठानमा उपचारका लागि आएको प्रतिष्ठानले जनाएको छ ।
निधन भएका व्यक्तिमा २८ भदौमा कोरोना पुष्टि भएको र ३० भदौमा उनलाई प्रतिष्ठानको कोभिड उपचार अस्पतालमा भर्ना गरिएको डा. सापकोटाले जानकारी दिए ।
उनले शवको नेपाली सेनाले व्यवस्थापनको तयारी गरिरहेको पनि जानकारी दिए ।