भरुवा बन्दुकको छर्रा लागेर अर्जुनचौपारी गाउँपालिका– १ माँझपाटामा एकजना घाइते भएका छन् । माँझपाटाका ६३ वर्षीय इन्द्रबहादुर क्षेत्रीले पड्काएको भरुवा बन्दुकको छर्राले लागेर बाटोमा हिँडिरहेका ४५ वर्षीय भीमबहादुर गोदार घाइते भएका हुन् ।
उनको पेटमा छर्रा लागेको जिल्ला प्रहरी कार्यालय स्याङ्जाका सूचना अधिकारी राजेन्द्रप्रसाद अधिकारीले जानकारी दिए । घाइते गोदारलाई उपचारका लागि पोखरा पठाइएको छ । बन्दुक पड्काउने क्षेत्रीलाई नियन्त्रणमा लिई ज्यान मार्ने उद्योग तथा हातहतियार खरखजाना मुद्दा दर्ता गरेको डिएसपी अधिकारीले बताए ।
यस्तै, पुतलीबजार नगरपालिका– ८ बाह्रकोट कल्लियाथोकका ३३ वर्षीय अमितसिंह ठकुरी भरुवा बन्दुकसहित पक्राउ परेका छन् । डिएसपी अधिकारीका अनुसार घरमा लुकाइछिपाई राखेको चार फिट पाँच दशमलव पाँच इन्च लम्बाइको एकनाले भरुवा बन्दुकसहित ठकुरीलाई नियन्त्रमा लिएको हो ।