बुधबार राति गएको बाढीले क्षति पुऱ्याएको स्थलगत निरीक्षणमा गृहमन्त्री रामबहादुर थापा पुगेका छन् ।
नेपाली सेनाको हेलिकाेप्टरमार्फत आएका गृहमन्त्री थापासहितको टोलीले भुजीखोलामा आएको भीषण बाढीले पुऱ्याएको क्षतिबारे स्थलगत जानकारी लिएको थियो । यस टोलीले त्रिपाल, टेन्ट, म्याटलगायतका राहतका सामग्रीसमेत वितरण गरेको छ ।
गृहमन्त्री थापा बिहीबार नै बाढी प्रभावित क्षेत्रका लागि प्रस्थान गरे पनि खराबीका कारण उनी सवार हेलिकोप्टर स्याङ्जाको आकाशबाटै फर्किएर पोखरा विमानस्थलमा आकस्मिक अवतरण गरेको थियो ।
अत्यधिक वर्षाका कारण मौसमले साथ नदिएपछि उनी पोखराबाट काठमाडाैं फर्किएको थिए । गृहमन्त्री थापा फर्किए पनि त्यसको एक घन्टाैंपछि कांग्रेस नेता जित शेरचन र द्रोण कुँवरले हेलिकाेप्टरमार्फत राहत लिएर घटनास्थलमा पुगेका थिए ।
बाढी प्रभावित क्षेत्रको स्थलगत जानकारीपछि गृहमन्त्री थापाले बाढीले क्षतिग्रस्त बनाएका घरको पुनर्निर्माण वर्षालगत्तै सुरु गरिने प्रतिबद्धता व्यक्त गरे ।
उनले ढोरपाटनको विपत्तिबाट देशमा नै ठूलो अकल्पनीय घटना व्यहोर्नुपरेको भन्दै घर र परिवार गुमाएकाहरूका लागि सरकारले साथ दिने बताए ।
बाढीका कारण अझै पनि थप जोखिमयुक्त बस्तीबारे पूर्वसचेतता अपनाउन र भौतिक पूर्वाधारको पुनर्निर्माणका लागि सम्बन्धित मन्त्रालयलका मन्त्रीसँग कुरा गर्ने थापाले प्रतिबद्धता जनाए ।
बाढी प्रभावित क्षेत्रका सांसद तथा नेकपाका नेता देवेन्द्र पौडेलसँगै विपतविज्ञको टोली पनि पुगेको थियो ।
बुधबार राति आएको बाढीले ढोरपाटन नगरपालिकाकाको वडा नम्बर ९ सहित ७ र ८ मा ठुलो क्षति पुऱ्याएको छ ।
बाढीमा परी १४ जनाको मृत्यु भएको छ भने २४ जना अझै बेपत्ता छन् ।
बाग्लुङ जिल्ला सदरमुकामबाट निकै टाढा १ सय २६ किलाेमिटर पश्चिममा पर्छ बाढी प्रभावित गाउँ रहेको छ ।
ढोरपाटन नगरपालिकाको वडा नम्बर ७, ८ र ९ अहिले बढी प्रभावित छ । यो ठाउँमा पुग्न सदरमुकामबाट बुर्तिबाङसम्म ९० किलाेमिटरको सवारी यात्रा गरेपछि त्यहाँबाट २६ किलाेमिटर दूरीमा अहिले पैदल यात्रा गर्नुपर्छ । यसका लागि ४ देखि ६ घन्टा लाग्ने स्थानीय बताउँछन् ।