बाजुरा जिल्ला सदरमुकाम मार्तडी जान तुइन चढेर यात्रा गर्नुपर्ने भएको छ । साँफे–मार्तडी सडकखण्डमा पर्ने बडिमालिका नगरपालिकाको जडाङको बुढीगंगा नदीमा रहेको बेलिब्रिज र झोलुंगेपुल बाढीले बगाउँदा स्थानीयले निर्माण गरेको तुइन चढेर यात्रा गर्नुपर्ने बाध्यता रहेको छ ।
तुइन चढेबापत प्रतिव्यक्ति ५० रुपैयाँ तिर्नुपर्छ । जिल्ला सदरमुकाम र बाजुरा जिल्लाको पूर्वीउत्तरी भेगमा रहेका स्थानीयको यातायात गर्नका लागि अर्को विकल्प नहुँदा यही तुइन चढ्नुपर्ने बाध्यता रहेको स्थानीय रिता शाहीले बताइन् । उनले भनिन्, ‘बुढीगंगा नदीको तुइनमा ५० रुपैयाँ तिरेर जिल्ला सदरमुकाम जान बाध्य भएका छाैँ ।’
यता परे बडुवा जोखिम मोलेर तुइन चलाइरहेका र प्रतिव्यक्ति ५० रुपैयाँ लिने गरेको भए पनि ज्यान जोखिममा राखेर वारपार गराउने गरेको बताउँछन् ।बाजुराको साँफे–मार्तडी सडकअन्तर्गत जडाङमा रहेको बुढीगंगा नदीमा बेलिब्रिज र झोलुंगेपुल बगाएपछि अहिले सो ठाउँमा तुइनबाट आवतजावत गर्नुपरेको छ ।
स्थानीयले आफैँ निर्माण गरेको तुइनमा दैनिक जोखिम यात्रा गरेर सदरमुकाम आउन र सदरमुकामबाट बाहिर जान बाध्य भएका छन् । साउन २५ गते राति अविरल वर्षासँगैे आएको बाढीले बेलिब्रिज र नजिकै रहेको झोलुंगेपुल बगाएपछि सो ठाउँमा आवतजावत गर्न स्थानीयले तुइन बनाएका हुन् ।