पार्टीभित्रको विवाद सुल्झाउने प्रयासस्वरूप लामो अवधिपछि छलफलमा जुटेका नेपाल कम्युनिस्ट पार्टी (नेकपा)का अध्यक्षद्वय केपी शर्मा ओली र पुष्पकमल दाहाल प्रचण्डले आज पनि छलफललाई निरन्तरता दिएका छन् ।
प्रधानमन्त्रीनिवास बालुवाटारमा दुई अध्यक्षबीच छलफल सुरु भएको दाहालका प्रेस संयोजक विष्णु सापकोटाले जानकारी दिए ।
अहिले दुई अध्यक्षबीच मात्र छलफल भइरहेको छ । छलफलमा पार्टीका अन्य नेताहरूलाई भने सहभागी गराइएको छैन ।
नाै दिनपछि बिहीबार नेकपाका दुई अध्यक्ष ओली र दाहाल छलफलमा जुटेका थिए । बिहीबारको छलफल सकारात्मक भनिए पनि बालुवाटारमा भएको छलफल सकिएलगत्तै प्रचण्ड–माधव नेपाल पक्षका प्रदेशस्तरीय केन्द्रीय सदस्यहरूको भेला डाकिएको थियो ।
दुवै अध्यक्ष पक्षले छलफललाई पनि निरन्तरता दिने, तर आ–आफ्नो पक्षको भेला र छलफललाई निरन्तरता दिने रणनीति अपनाएको देखिन्छ ।
सत्तारुढ दल नेकपामा लामो समयदेखि संघर्ष चर्किइरहेको छ । जसका बारेमा दुवै अध्यक्ष र अन्य शीर्ष नेता पक्षधर नेताहरूले सार्वजनिक रूपमा आरोप–प्रत्यारोपसमेत गरिरहेका छन् ।