सभामुख अग्निप्रसाद सापकोटा पहिरो निरीक्षणका लागि सिन्धुपाल्चोकको लिदी पुगेका छन् । नेपाली सेनाको हेलिकोप्टरमार्फत सापकोटा पहिरो गएको क्षेत्रको निरीक्षणका लागि गएका हुन् ।
सिन्धुपाल्चोकको जुगल गाउँपालिका– २ लिदीमा शुक्रबार बिहान साढे ६ बजे गएको भीषण पहिरोमा परेर कम्तीमा ३५ जना मानिस बेपत्ता भएका छन् । पहिरोले कम्तीमा २८ घर पुरेको छ । नौजना घाइते भएका छन् ।
घाइतेमध्ये पाँचजनाको अवस्था गम्भीर छ । उनीहरूलाई उपचारका लागि चौतारा लगिएको सभामुख अग्नि सापकोटाका प्रेस संयोजक श्रीधर न्यौपानेले बताए । उनी सभामुख सापकोटासँगै घटनास्थल पुगेका छन् ।
वडाध्यक्ष प्रताप लामाका अनुसार प्रतिघरधुरी कम्तीमा तीनदेखि पाँचजना मानिस बसोवास गर्थे । पहिरोमा परेर ठूलो जनधनको क्षति भएको उनको अनुमान छ ।
उद्धारका लागि प्रहरी घटनास्थलतर्फ गएको जिल्ला प्रहरी कार्यालयले जनाएको छ । चौताराबाट हेलिकोप्टरमा गएको गोरखबहादुर गणका सेनाको प्राविधिक टिमले उद्धार कार्यलाई अगाडि बढाएकाे छ ।
घटनाको पूर्ण विवरण आउन बाँकी नै छ ।
तस्बिर : प्रेस संयोजक श्रीधर न्यौपानेकाे फेसबुकबाट