प्रदेश १ कांग्रेस संसदीय दलले पिसिआर परीक्षणको दायरा बढाएर, आइसोलेसन र भेन्टिलेटरसहितको अस्पताल तुरुन्त स्थापना गर्न प्रदेश सरकारसँग माग गरेको छ ।
कांग्रेस संसदीय दलका प्रमुख सचेतक केदार कार्कीले विज्ञप्ति जारी गर्दै जनताको जिउधनको सुरक्षाका लागि पिसिआर परीक्षणको दायरा बढाउन र भेन्टिलेटरसहितको अस्पताल चाँडो स्थापना गर्न प्रदेश १ सरकारसँग आग्रह गरेका हुन् ।
कोरोना रोकथाम, नियन्त्रण र उपचारमा प्रदेश सरकार जिम्मेवार नभएको भन्दै कांग्रेसले जिम्मेवार बन्न प्रदेश सरकारलाई आग्रह गरेको छ ।
लकडाउनअगाडि नै आफ्नो दलले कोभिड– १९ को संक्रमण बढ्ने खतरा औंल्याउँदै सम्पूर्ण तयारी गर्न सरकारलाई झकझकाएको कांग्रेसको दाबी छ ।
सरकारले मिडिया र संसदमा पटक–पटक पर्याप्त मात्रामा आइसोलेसन बेड तयारी रहेको भनी दिएको अभिव्यक्ति अहिले आएर झुटाे साबित भएकोले उल्लेख गर्दै सरकारले काम कम र गफ बढी गरेको प्रस्ट भएको कांग्रेस संसदीय दलको ठहर छ ।
मोरङको गोठगाउँको पूर्वाञ्चल विश्वविद्यालयको अस्पताल लेभल १, विराटनगरको कोसी कोभिड अस्पताल लेवल २ र धरानको बिपी प्रतिष्ठान लेभल ३ भने पनि समुदायमा संक्रमण फैलिएर संक्रमित बढेपछि संक्रमितलाई व्यवस्थापन गर्न प्रदेश सरकार असफल भएको कांग्रेसको निष्कर्ष छ ।