कोरोना भाइरस संक्रमण निरन्तर बढ्न थालेपछि मोरङका नौवटा स्थानीय तहमा लकडाउन गरिएको छ । १६ साउनमा विराटनगर महानगरपालिकाले संक्रमण बढेको भन्दै लकडाउन घाेषणा गरेको थियो । यसपछि बिहीबार राति १२ बजेदेखि लागू हुने गरी मोरङका रंगेली, रतुवामाई, धनपालथान, सुनबर्सी, सुन्दरहरैँचा, पथरीशनिश्चरे, बेलबारी, कानेपोखरीले लकडाउन घोषणा गरेका छन् । कोरोना भाइरस नियन्त्रण गर्नका लागि स्थानीय तहलाई अधिकार दिएपछि आफूअनुकूल हुने गरी स्थानीय तहले लकडाउन घोषणा गर्न थालेका हुन् ।
लकडानका वेला स्वास्थ्य संस्था, डेरी, भेटेनरी पसल मात्रै सञ्चालन गर्न सूचना जारी भएको बेलबारी नगरपालिकाका नगर प्रमुख ज्ञानेन्द्र सुवेदीले बताए । संघीय सरकारले कोरोना भाइरसको रोकथाम तथा नियन्त्रणका लागि ११ चैतमा लकडाउन घोषण गरेको थियो । करिब चार महिना देशभर भएको लकडाउन ७ साउनदेखि हटाएको थियो ।