कोभिड–१९ को महामारीका कारण अन्तर्राष्ट्रिय बजारमा अस्थिर रहेको सुनचाँदीको मूल्य स्थानीय बजारमा आज अप्रत्यासित रूपमा बढेको छ । मंगलबार  प्रतितोला रु. ९९ हजार ८०० मा कारोवाबार भएको पहेँलो धातुमा आज रु. एक हजार ६०० ले वृद्धि भएको छ ।

बजार खुल्नेबित्तिकै छापावाल सुनको मूल्य प्रतितोला रु. एक लाख एक हजार चार सय कायम भएको छ भने सोही परिमाणको तेजाबी सुनको मूल्य रु. एक लाख ९०० निर्धारण  गरिएको छ । 

नेपाल सुनचाँदी व्यवसायी महासंङका अनुसार मंगलबारको  तुलनामा आज चाँदीको मूल्य रु. ६५ ले बढेको छ । एकतोला सेतो धातुको मूल्य आज रु. एक हजार २ सय ९५ निर्धारण भएको छ ।

कोभिड–१९ को सङ्क्रमण रोक्न बन्दाबन्दी लागू गरिएयता जेठ २५ गते एक तोला सुनको मूल्य रु. १० हजार चार सयले बढेर रु. ८७ हजार पुगेको थियो । त्यसयता सुनको मूल्य निरन्तर उकालो लागिरहेको छ ।  

आज अन्तर्राष्ट्रिय बजारमा सुन प्रतिऔँस २,०२४.५३ अमेरिकी डलर कायम भएको छ । त्यसैगरी प्रतिऔँस चाँदी २५.९६ अमेरिकी डलर निर्धारण भएको छ ।रासस