समुदायस्तरमा संक्रमण फैलिसकेको भन्दै नियन्त्रण गर्न पुनः लकडाउन घोषणा भएको विराटनगर महानगरपालिकामा साेमबार बिहानसम्म थप २२ जनामा कोरोना संक्रमण देखिएको छ ।
योसँगै विराटनगरमा संक्रमितको संख्या एक सय ३४ पुगेको छ ।
संक्रमित हुनेमा प्रदेशका एक उच्च अधिकारीसहित ३३ जना प्रहरी र २० जना स्वास्थ्यकर्मीसमेत छन् ।
१७ साउनदेखि विराटनगरमा १४ दिनका लागि लकडाउन घोषणा गरिएको हो । सरकारले देशव्यापी गरेको लकडाउन खुला भएसँगै संक्रमितहरू जथाभावी हिँड्न थालेको र उनीहरूलाई फेलापार्न गाह्रो हुन थालेपछि परीक्षणको दर बढाउन र भिड नियन्त्रण गर्नका लागि महानगरपालिकाले दोस्रोपटक लकडाउन घोषणा गरेको हो ।
विराटनगरमा हालसम्म ३० जना संक्रमित मात्रै निको भएर उपचार केन्द्रबाट डिस्चार्ज भएका छन् । महानगरपालिकाले तीनवटा पर्यटकस्तरका होटेल र अतिथि सदनसहित जम्मा नाै स्थानमा क्वारेन्टाइन सञ्चालन गर्दै आएको छ ।
जनस्वास्थ्य महाशाखाका अनुसार हालसम्म विराटनगर महानगरमा २५ सयभन्दा बढीको पिसिआरका लागि नमुना संकलन भइसकेको छ । संकलित नमुनामध्ये तीन सयको परीक्षण रिपाेर्ट आउन बाँकी छ ।