लमजुङमा पछिल्लो समय डेँगुको संक्रमण बढेको छ । बुधबार, बिहीबार र शुक्रबार तीन दिनमा तीनजनामा डेँगुको संक्रमण देखिएको लमजुङ जिल्ला सामुदायिक अस्पतालले जनाएको छ ।
अस्पतालका प्रमुख हेमन्त श्रेष्ठका अनुसार बुधबार बेसीसहर नगरपालिका– ३ का १७ वर्षीया महिलामा डेँगुको संक्रमण देखिएको हो । यस्तै बिहीबार बेसीसहर नगरपालिका– ९ का २१ वर्षीय पुरुषमा र शुक्रबार बेसीसहर नगरपालिका– ८ का २९ वर्षीय पुरुषमा डेँगुको संक्रमण देखिएको हो ।
टाउको दुख्ने र उच्च ज्वरो आउने समस्यापछि अस्पतालमा आएका तीनैजनाको परीक्षण गर्दा डेँगुको संक्रमण देखिएकाे अस्पताल प्रमुख श्रेष्ठले बताए ।
स्वास्थ्य कार्यालय लमजुङका प्रमुख अमर दवाडीले पछिल्लो समय तीनजनामा डेँगु रोगको संक्रमण देखिएको र उनीहरूको लमजुङ जिल्ला सामुदायिक अस्पतालमा उपचार भइरहेको बताए ।
दवाडीका अनुसार यसअघि असार ३० गते क्व्होलासोंथर गाउँपालिका २ मालिङ घर भई बेसीसहर नगरपालिका– ७ घलेगाउँचोक बस्ने २९ वर्षीया महिलामा डेँगु देखिएको थियो । आर्थिक वर्ष ०७६/७७ मा जिल्लामा पाँच जनामा डेँगुको संक्रमण देखिएको स्वास्थ्य कार्यालयका प्रमुख दवाडीले बताए ।
लामखुट्टेको टोकाइबाट सर्ने यो रोग एक व्यक्तिबाट अर्काे व्यक्तिमा सजिलै सर्न सक्ने भएकाले सचेत रहन स्वास्थ्य कार्यालय लमजुङले सबैमा आग्रह गरेको छ ।