धनगढीमा एकैदिन १६ जनामा कोरोना संक्रमण, सुदूरपश्चिम प्रदेशमा २६ मा संक्रमण
सुदूरपश्चिममा आज थप २६ जनामा कोरोना संक्रमण पुष्टि भएको छ । धनगढीमा मात्रै १६ जनामा संक्रमण देखिएको छ ।
सेती प्रादेशिक अस्पतालको प्रयोगशालामा गरिएको परीक्षणमा कैलालीका २३, बझाङका दुई र कञ्चनपुरका एकजनामा संक्रमण पुष्टि भएको हो ।
कैलालीको टीकापुरमा सातजनामा कोरोना संक्रमण देखिएको छ । टीकापुरमा १८ महिने शिशुमा समेत कोरोना देखिएको सेती प्रादेशिक अस्पतालका प्रमुख मेडिकल सुपरिटेन्डेन्ट डाक्टर हेमराज पाण्डेयले जानकारी दिए ।
पछिल्लो २४ घन्टामा दुई सय ७१ जनाको थ्रोट स्वाबको नमुना जाँच गरिएको उनले बताए ।
सुदूरपश्चिममा हालसम्म चार हजार दुई सय ९२ जनामा कोरोना देखिएको छ ।
सबैभन्दा बढी कैलालीमा संक्रमित हुनेको संख्या एक हजार एक सय ३० जना पुगेको छ ।
यस्तै संक्रमित बढी भएका जिल्ला डोटीमा सात सय १५ जना, अछाममा ६ सय ६७ र कञ्चनपुरमा पाँच सय २३ जनामा कोरोना पुष्टि भएको छ ।
हालसम्म संक्रमण देखिएकामध्ये तीन हजार आठजना संक्रमणमुक्त भएर घर फर्किसकेका प्रदेशको सामाजिक विकास मन्त्रालयका कोरोना फोकल पर्सन नरेन्द्रसिंह कार्कीले जानकारी दिए ।
सुदूरपश्चिममा संक्रमण देखिएका नौजनाको मृत्यु भएको छ ।
शंकास्पद १४ जना बिरामीलाई विभिन्न अस्पतालको आइसोलेसनमा राखेर उपचार भइरहेको कार्कीले जानकारी दिए ।