समुदायस्तरमा कोरोना भाइरस संक्रमण हुन थालेको भन्दै विराटनगर महानगरपालिकाले रोकथामका लागि निजी क्षेत्रका विज्ञ र सरकारी प्रतिनिधिलाई सहभागी गराए विभिन्न समिति निर्माण गरेको छ ।
आमनागरिकको सहयोग लिएर संक्रमण रोकथाम गर्न महानगरपालिकाले अलग–अलग होम क्वारेन्टाइन, पिसिआर ल्याब स्थापना, मनोपरामर्श र कन्ट्याक ट्रेसिङ समिति बनाएको हो ।
होम क्वारेन्टाइन समितिको संयोजकमा डा. हेमसागर रिमाल, पिसिआर ल्याब स्थापना समितिको संयोजकमा डा. सुशील तापडिया, मनोपरामर्श समितिको संयोजकमा डा. अर्चना पोखरेल संयोजक र कन्ट्याक ट्रेसिङ समितिको संयोजकमा डा. सूर्य पराजुली संयोजक छन् ।
विराटनगर महानगरपालिका प्रमुख भीम पराजुलीका अनुसार गठित समितिहरूले सदस्यहरूलाई परिचालन गरेर आ–आफनो क्षेत्राधिकारभित्र संक्रमण रोकथाममा सहयोग गर्नेछन् ।
विराटनगरका सबै अस्पताल तथा नर्सिङहोममा कार्यरत प्राविधिक तथा प्रशासनिक कर्मचारीलाई कोरोना संक्रमण भए आ–आफ्ना अस्पतालमै व्यवस्थापन गराउने महानगरपालिकाले जनाएको छ ।
विराटनगर महानगरपालिकामा बिहीबारसम्म ९५ जना कोरोना संक्रमित पाइएका छन् ।
तीमध्ये ३० जना निको भएर उपचार केन्द्रबाट डिस्चार्ज भएका छन् ।
विराटनगरबाट कहीँकतै यात्रा नगरेका प्रहरी, चिकित्सक, स्वास्थ्यकर्मीलगायतमा कोरोना संक्रमण भइसकेकोले समुदायस्तरमा संक्रमण फैलिइसकेको दाबी महानगरपालिकाको स्वास्थ्य महाशाखाको छ ।
महानगरपालिकाले अनिवार्य मास्क लगाउन र सामाजिक दूरी बनाउन आमसर्वसाधारणमा अपिल गरिरहेको छ ।
साथै आइसोलेसन सेन्टर र परीक्षणको दायरा बढाउन प्रदेश सरकारसँग अनुरोध गरेको छ ।
क्वारेन्टाइनको संख्या बढाउने पनि महानगरपालिकाले तयारी गरिरहेको जनाएको छ ।