दोस्रो विश्व ज्ञान सम्मेलन असोजमा हुने
सरकारको १५औँ पञ्चवर्षीय योजनाका विषयमा कार्यपत्र प्रस्तुत
गैरआवासीय नेपाली संघले दोस्रो विश्व ज्ञान सम्मेलन असोजमा गर्ने भएको छ । बिहीबार विज्ञप्ति जारी गरी सम्मेलनको विषयमा जानकारी दिएको हो ।
विदेशमा रहेका र विदेशबाट फर्किएका नेपालीको ज्ञान, सीप र बौद्धिकतालाई नेपालको विकास एवं समृद्धिका लागि प्रयोगमा ल्याउन दुई वर्षअघि विश्व ज्ञान सम्मेलन आयोजना गर्न सुरु गरिएको थियो । यसलाई निरन्तरता दिँदै दोस्राे एनआरएन विश्व ज्ञान सम्मेलन असोजको २३ देखि २५ सम्म दुई दिन गर्ने निर्णय गरिएको छ ।
कोरोना भाइरस संक्रमणले विश्व नै आक्रान्त बनेको र नेपालको अर्थतन्त्र धराशायी बनेको भन्दै सम्मेलनले कोरोनाले नेपालमा पारेको प्रभाव र कोरोनापश्चात् विश्वभर चालिएका कदम र नेपालले अवलम्बन गर्नुपर्ने रणनीतिका केन्द्रित हुने बताएको छ ।
साथै सम्मेलन संयुक्त राष्ट्रसंघको दिगो विकासको लक्ष्य र नेपाल सरकारको १५औँ पञ्चवर्षीय योजनाका विषयमा विज्ञहरूले कार्यपत्र प्रस्तुत गर्नेछन् ।
गैरआवासीय नेपाली संघ र नेपाल सरकारको सहकार्यमा हुन लागेको यस सम्मेलनमा चार प्लेनरी सेसन र १५ सिम्पोसियम सेसनको आयोजना हुनेछ । सम्मेलनमा गैरआवासीय नेपाली विज्ञहरू, नेपालमा रहेका विज्ञहरू र नेपालसँग जोडिएका विदेशी विज्ञहरूका दुई सयभन्दा बढी कार्यपत्र प्रस्तुत हुनेछन् ।