सुदूरपश्चिम प्रदेशमा १७ जना कोरोना संक्रमित थपिएका छन् ।
सेती प्रादेशिक अस्पताल धनगढीको प्रयोगशालामा पछिल्लो २४ घन्टामा तीन सय ४६ जनाको थ्रोट स्वाबको नमुना परीक्षण गरिएकोमा १७ जनामा संक्रमण पुष्टि भएको हो ।
अछामका १४ र बाजुराका तीनजनामा संक्रमण भएकाे सेती प्रादेशिक अस्पतालका प्रमुख मेडिकल सुपरिटेन्डेन्ट डाक्टर हेमराज पाण्डेयले जानकारी दिए ।
योसँगै सुदूरपश्चिममा संक्रमितको संख्या चार हजार ८२ जना पुगेको छ । हालसम्म दुई हजार दुई सय ९६ जना संक्रमणमुक्त भएर घर फर्किसकेकाे प्रदेशको सामाजिक विकास मन्त्रालयले जनाएको छ ।
सुदूरपश्चिममा पछिल्ला केही दिनयता नयाँ संक्रमण घट्दो क्रममा छ । संक्रमण दर न्यून देखिएपछि र संक्रमितहरू निको भएर फर्केपछि धनगढीमा सेती प्रादेशिक प्रादेशिक अस्पतालको काेरोना वार्ड अहिले खाली भएको छ ।
प्रदेशभर ५६ जना संक्रमितको विभिन्न जिल्लाका पाँचवटा अस्पतालका आइसोलेसनमा उपचार भइरहेको सामाजिक विकास मन्त्रालयका कोरोना फोकल पर्सन नरेन्द्रसिंह कार्कीले जानकारी दिए । अन्य संक्रमित स्थानीय तहका आइसोलेसनमा रहेकाे उनले बताए ।
सुदूरपश्चिममा हालसम्म पाँच सयभन्दा बढी संक्रमित देखिएका जिल्ला चारवटा छन् ।
कैलालीमा सबैभन्दा बढी एक हजार ७५ जनामा संक्रमण पुष्टि भएको छ ।
यस्तै अछाममा ६ सय ५१, डोटीमा ६ सय पाँच र कञ्चनपुरमा ५ सय १३ जनामा संक्रमण देखिएको कोरोना फोकल पर्सन कार्कीले बताए ।
अहिले साढे चार हजारजना क्वारेन्टाइनमा रहेका उनले जानकारी दिए ।