पर्सा निर्वाचन क्षेत्र नम्बर १ का सांसद प्रदीप यादवले संसदीय विकास कोषबाट शंकराचार्यद्वार अगाडि निर्माण गराएका राष्ट्रिय झन्डासहितको ‘फ्ल्याग टावर’को उद्घाटन गरेका छन् ।
१३ लाख ६२ हजार रुपैयाँमा निर्माण भएकाे एक सय दश फिट उचाइको टावरमा ३० फिट लामो राष्ट्रिय झन्डाको सांसद यादवले उद्घाटन गरेका हुन् ।
संसदीय पूर्वाधार विकास कोषबाट १० लाख र बाँकी रकम आफ्नो तलब भत्ताको रकमबाट फ्ल्याग टावर निर्माण गरिएको सांसद यादवले बताए ।
मुलुकको मुख्य प्रवेशद्वारमा राष्ट्रको गौरव र सम्पूर्ण नेपालीको पहिचान झल्कने राष्ट्रिय झन्डा स्थापना गरेर गर्वको अनुभूति भएको उनले बताए ।
खुला सीमाका कारण वीरगन्ज र रक्सौललाई छुट्याउन नसक्ने भएकाले नेपाल प्रवेश गर्ने विदेशीलाई नेपालमा प्रवेश गरेको अनुभूति यो राष्ट्रिय झन्डाले दिनेछ ।