कोरोना संक्रमण फैलिएपछि अमेरिकी राष्ट्रपति डोनाल्ड ट्रम्पले फ्लोरिडामा आयोजना गर्न लागिएको रिपब्लिकन पार्टीको चुनावी सभा स्थगित गरेका छन् ।
अमेरिकामा दिनप्रतिदिन बढ्दो कोरोना भाइरस प्रकोपका कारण उक्त सम्मेलन स्थगित गरिएको राष्ट्रपति ट्रम्पले बताएका छन् ।
‘यो समय सम्मेलन गर्नका लागि उचित होइन । त्यसैले यो सम्मेलन स्थगित गर्नुपर्छ म साथीहरूलाई अनुरोध गर्नेछु,’ राष्ट्रपति ट्रम्पले भनेका छन् ।
ह्वाइटहाउसमा आयोजित पत्रकार सम्मेलनमा उनले अर्को महिना ज्याक्सनभिल्लेमा गर्न लागिएको अर्को भेला पनि रद्द गरेको जानकारी दिए । राष्ट्रपति ट्रम्पले यस्तो संकटको समयमा ठूला, भिडभाडयुक्त भेला गर्नु उपयुक्त नभएको स्पष्ट पारे ।
अमेरिकी जोन्स हप्किन्स विश्वविद्यालयले संयुक्त राज्य अमेरिकामा कोरोना भाइरस संक्रमितको संख्या ४० लाखभन्दा बढी पुगिसकेको विवरण सार्वजनिक गरेको केही घन्टापछि राष्ट्रपति ट्रम्पले यस्तो घोषणा गरेका हुन् ।
राष्ट्रपति ट्रम्पले उत्तरी क्यारोलिनामा चाँडै अर्को भेला आयोजना गर्ने जानकारी दिए ।
यो बैठकले आगामी नोभेम्बरमा हुने अमेरिकी राष्ट्रपतिको चुनावका लागि रिपब्लिकन पार्टीका तर्फबाट राष्ट्रपति ट्रम्पलाई पुनः उम्मेदवार बनाउन औपचारिक मनोनयन गर्नेछ ।