पहिरोका कारण मंगलबारदेखि अवरुद्ध मध्यपहाडी लोकमार्गको बाग्लुङखण्ड खुलेको छ । लोकमार्गको बिहुँ–बाग्लुङखण्डअन्तर्गत बोक्सेमा खसेको पहिरोले सडक अवरुद्ध हुँदा तीन दिनदेखि सवारीसाधन बीचबाटोमै रोकिएका थिए ।
पहिरोले लोकमार्ग मात्र नभई सिगाना हुँदै बरेङ जाने सडक पनि अवरुद्ध बनेको थियो । बुधबारदेखि नै पहिरो हटाउन प्रयास भए पनि बिहीबार साँझ मात्रै एकतर्फी रूपमा यातायात सञ्चालनमा आएको जिल्ला प्रशासन कार्यालय बाग्लुङका प्रशासकीय अधिकृत केशव लामिछानेले बताए ।
गलकोट खण्ड भसियो
लगातारको वर्षाले लोकमार्गको गलकोट खण्डको ठाउँठाउँमा भासिएको छ । गलकोट नगरपालिका–१ र २ का विभिन्न स्थानमा सडक भासिएको स्थानीयले बताएका छन् ।
गलकोट नगरपालिकाका नगर प्रमुख भरत शर्मा गैरे, नगर उपप्रमुख रेणुका काउचा मगरसहितको टोलीले लोकमार्गको स्थलगत अवलोकन गरेको छ । नगरप्रमुख गैरेका अनुसार दुदिलाभाटीको भुंखानीमा ४० मिटर, काफलठुटामा १० मिटर, चौराहामा १० मिटर, जम्दारे घुम्तीमा २० मिटर सडक भासिएको हो । सडक भासिएपछि तल्लो क्षेत्रमा पहिरो पनि खसेको छ । पहिरोले किसानको खेतीपाती बगाएको छ । कतिपय स्थानमा सडक चिरा परेको गैरेले बताए । सडक चिराचिरा परेपछि नरेठाटी बजेनीका नौ घर पहिरोको उच्च जोखिममा छन् ।