लमजुङकाे मर्स्याङ्दी गाउँपालिका– ३ मा लगातार पहिरोले बुधबार दिउँसाे १९ घर बगायो । पहिरो निरन्तर जारी रहेकाले राति थप दुई घर बगायो ।
बिहीबार बिहानसम्म २१ घर पूर्ण रूपले ध्वस्त भएका छन् । बिहीबार पनि पहिरो चलिरहेको स्थानीय हरि थापाले बताए ।
पहिरोबाट अन्य ५९ घर उच्च जोखिममा छन् । अधिकांश घर पहिरोले आधा पुरिसकेका छन् । सो गाउँमा ८० घर थिए । ८० घरका करिब चार सय परिवारलाई अन्यत्र स्थानान्तरण गरेर गाँसवासको व्यवस्था मिलाइएको वडाध्यक्ष प्रेमबहादुर बस्नेतले बताए ।
पहिरोले देवबहादुर गोतामे, सतिश गोतामे, रञ्जना गोतामे, काली अधिकारी, बुद्धिमाया अछामी, बाबुराम अछामी, सन्दीप अछामी, सन्तबहादुर अछामीको घर बगाएको छ ।
यस्तै उत्सव गोतामे, अनिता गोतामे, आइतबहादुर गोतामे, मानबहादुर अछामी, हिरा गोतामे, सुशीला गोतामे, दीपेन्द्र मजाकोटी, सुनिता मजाकोटी, राजेश मजाकोटी, फुलमाया मजाकोटी, अतिमान गोतामेको घर पहिरोले बगाएको छ ।
पहिरो झरेपछि भाग्दै गर्दा आठजना घाइते भएका छन् । घाइतेमध्ये दुईजनाको लमजुङ सामुदायिक अस्पताल बेसीसहर र अन्यको खुदी स्वास्थ्य चौकीमा उपचार भइरहेको छ ।
मंगलबार सोही स्थानमा पहिरो गएको थियो । पहिरो जोखिमको पूर्वानुमान गर्दै छिमेकी गाउँमा स्थानान्तरण गरिएकाले मानवीय क्षति हुन नपाएको प्रहरी नायव उपरीक्षक गंगाबहादुर थापाले बताए ।
पहिरोको उच्च जोखिममा परेकाहरूको स्थानान्तरणमा नेपाल प्रहरी, नेपाली सेना, सशस्त्र प्रहरी, जनप्रतिनिधिहरू खटिएका थिए ।
उनीहरूलाई विद्यालय, सामुदायिक भवनमा अस्थायी रूपमा स्थानान्तरण गरी खाने–बस्ने व्यवस्था गरिएको गाउँपालिका अध्यक्ष अर्जुन गुरुङले बताए ।
पहिरोपीडितहरूलाई स्थान्तरणपछिको खानपिन र बसोवासका लागि जिल्ला विपत् व्यवस्थापन समिति, रेडक्रस, आरसिडिसीलगायतले राहत सामग्री प्रदान गरेका छन् ।
उक्त स्थानमा ०७५ सालमा पहिरो जाँदा दुईजनाको मृत्यु भएको थियो ।