नेपाल कम्युनिस्ट पार्टी (नेकपा) का दुई अध्यक्षबीच बुधबार बालुवाटारमा छलफल सुरु भएको छ ।
प्रधानमन्त्री केपी शर्मा ओली र अर्का अध्यक्ष पुष्पकमल दाहाल प्रचण्डबीच विषयकेन्द्रित छलफल हुने स्रोतले जनाएको छ । दुवै अध्यक्षबीच गत बुधबारयता ६ दिनपछि मंगलबार छलफल भएको थियो । उक्त वार्ता एजेन्डाकेन्द्रित थिएन ।
गत असार १० गतेबाट जारी सो पार्टीको स्थायी समिति बैठकमा ओलीलाई प्रधानमन्त्री तथा अध्यक्ष दुवै पदबाट राजीनामा मागिएपछि नेकपाभित्रको विवाद उत्कर्षमा छ ।
गत बिहीबार छलफल गर्ने गरी छुटेका दुई अध्यक्षको सहमतिमा शुक्रबार बोलाइएको स्थायी कमिटी बैठक २ साउनसम्म स्थगित भएको थियो ।
बाढीपहिरोका कारण एक साताका लागि बैठक स्थगित गरेर नेकपाले नेता–कार्यकर्तालाई राहत तथा उद्धारमा केन्द्रित रहन निर्देशन दिने र यस अवधिमा पार्टीभित्र देखिएका समस्या समाधानमा सहमतिको प्रयास गर्ने समझदारी भए पनि ओली–प्रचण्डबीच ६ दिनपछि मात्र छलफल भएको हो ।
यसैबीचमा चितवन पुगेका प्रचण्डले आफू र प्रधानमन्त्री ओलीलाई उचाल्ने शक्ति पहिचान भइसकेको भन्दै सहमति हुन सक्ने संकेत गरेका थिए ।
लगत्तै राष्ट्रका नाममा सम्बोधन गर्दै प्रधानमन्त्री ओलीले पार्टीभित्रको आन्तरिक विवाद वार्ता र संवादबाटै समाधान हुने अभिव्यक्ति दिएका थिए ।
यससँगै नेकपाको आन्तरिक संकट सहमतिमै टुंगिने नेताहरूले दाबी गर्दै आए पनि नयाँ सहमति भने भइसकेको छैन ।