उमेर सच्याएर जागिर खाएको अभियोगमा नेपाल प्रहरीका डिएसपी रमेशबहादुर सिंहविरुद्ध विशेष अदालतमा मुद्दा दायर भएको छ । २६ वर्षको उमेर हुँदा नागरिकताको प्रतिलिपि बनाई २५ वर्ष बनाएर इन्स्पेक्टरमा भर्ना भएका थिए ।
उनले उमेर सच्याएको पुष्टि भएपछि अख्तियार दुरुपयोग अनुसन्धान आयोगले मुद्दा दायर गरेको हो ।
उनले ०३२/१०/१२ जन्ममिति राखेर बझाङबाट नागरिकता बनाएका थिए । ०५८ सालमा प्रहरीको इन्स्पेक्टर खुल्दा उनी २६ वर्ष पुगिसकेका थिए । त्यसपछि नागरिकता हराएको बहानामा जिल्ला प्रशासन कार्यालय, काठमाडौंबाट उनले प्रतिलिपि लिए । जसमा जन्ममिति ०३३/१०/१२ बनाइएको थियो । सोही नागरिकताका आधारमा शैक्षिक प्रमाणपत्रहरूमा समेत जन्ममिति सच्याइएको थियो ।
डिएसपी सिंह इन्स्पेक्टरका रूपमा ललितपुरमा कार्यरत रहँदा घुससहित पक्राउ परेकोमा पछि विशेष अदालतबाट सफाइ पाएका थिए । सफाइ पाएपछि तत्कालीन प्रहरी महानिरीक्षक सर्वेन्द्र खनालले इप्रका कोहलपुर र बौद्ध वृत्तको जिम्मेवारी दिएका थिए ।