दक्षिणी चीन सागरको विषयलाई लिएर अमेरिकाले चीनप्रति कडा प्रतिक्रिया दिएको छ ।
अमेरिकी विदेशमन्त्री माइक पोम्पियोले दक्षिण चीन सागरमा चीनको गतिविधि गैरकानुनी भएको बताएका छन् ।
उनले विवादित क्षेत्रलाई नियन्त्रण गर्न चीनले गरिरहेको आक्रामक प्रयास गलत भएको बताएको अमेरिकी समाचार संस्था सिएनएनले जनाएको छ ।
चीनले पछिल्ला दिनमा दक्षिण चीन सागरको ठूलो हिस्सालाई आफ्नो क्षेत्र भएको दाबी गर्दै भौतिक संरचनासमेत बनाएको छ भने सैनिक क्याम्पहरू बनाइरहेको पश्चिमी देशहरूको आरोप छ ।
यस क्षेत्रका कतिपय द्वीपहरूमाथि चीनसहित ताइवान, फिलिपिन्स, ब्रुनाई, मलेसिया तथा भियतनामले दाबी गर्दै आएका छन् ।
दक्षिण चीन सागरका विषयमा चीनसँग यी देशहरूको लामो समयदेखि मतभेद रहँदै आएको छ भने चीनले यस क्षेत्रमा बढाएको सक्रियतासँगै यी देशहरूले पनि चीनको गतिविधिप्रति विरोध जनाउँदै आएका छन् ।