सरकारी अधिकारीहरूको मनलाग्दी : नक्कली व्यक्ति खडा गरी ३२ रोपनी जग्गा बेचबिखन गर्ने सहसचिवसहित १३ जनाविरुद्ध अख्तियारले हाल्याे मुद्दा
नक्कली व्यक्ति खडा गरी सरकारका नाममा आउनुपर्ने ३२ रोपनी जग्गा बेचबिखनमा संलग्न सहसचिवसहित १३ जनाविरुद्ध अख्तियार दुरुपयोग अनुसन्धान आयोगले विशेष अदालतमा मुद्दा दायर गरेको छ ।
नवलपरासी जिल्लाको साबिक सनई गाविसमा पर्ने हदबन्दी रोक्का रहेका जग्गा नक्कली व्यक्ति खडा गरी बेचबिखन गरिएको अख्तियारले जनाएको छ ।
नक्कली व्यक्ति प्रेमशरण खत्रीका नाममा कायम रहेका जग्गाहरू मिलेमतोमा अनुप मेहरा भन्ने भारतीय नागरिकलाई अनुपकुमार खत्री बनाई उनको नामबाट विभिन्न व्यक्तिहरूलाई बिक्री–वितरण गरिएको थियो ।
पिएस मेहराका छोरा अनुप मेहरा भारतमा बसोवास गर्ने र भारतमै मृत्यु भएका व्यक्ति हुन् ।
तर, उनलाई नेपालमै बसोवास गर्ने र नेपालमै मृत्यु भएको भनी गलत नाता प्रमाणित, मृत्यु दर्ता प्रमाणपत्रलगायतका गलत कागजात बनाई सम्बन्धित हकवाला व्यक्ति नै फरक पारी जग्गा हिनामिना गरिएको थियो ।
भूमिसुधार कार्यालय नवलपरासीका तत्कालीन मालपोत अधिकारी ईश्वरप्रकाश कलवारले गलत कागजातका आधारमा कानुनविपरीत तीन परिवार संख्या कायम गर्ने गरी गैरकानुनी निर्णय गरेका थिए ।
सोही निर्णयलाई कार्यान्वयन गराएको भनी मालपोत कार्यालयका तत्कालीन प्रमुख मालपोत अधिकृत र स्थानीय निकायसमेतको मिलेमतोमा नेपाल सरकारका नाममा आउनुपर्ने ३२ रोपनी जग्गा भारतीय नागरिक पिएस मेहराको छोरा अनुप मेहराबाट बिक्री–वितरण गराइएको थियो ।
जग्गा हिनामिनामा संलग्न तत्कालीन प्रमुख मालपोत अधिकृत टीकाराम ज्ञवाली, भूमिसुधार अधिकारी ईश्वरप्रकाश कलवार, मालपोत अधिकृत मनोहरप्रसाद पन्थी, नासु बुद्धिसागर तिवारी, रमेशमान श्रेष्ठलगायतमाथि मुद्दा दायर गरिएको छ ।
त्यस्तै, तत्कालीन गाविससचिवत्रय नन्दलाल दास, बुद्धिसागर सुवेदी र नन्दलाल कुम्हाल कोहार, कम्प्युटर अपरेटर सुवास खड्का, खरिदारहरू नेत्रबहादुर चौधरी, अमृतकुमार काम्मु मगर र खगेन्द्र पराजुली तथा गैरमी गाउँपालिका वडा नम्बर ५ का रविकुमार खत्रीविरुद्ध पनि अख्तियारले मुद्दा दायर गरेको छ ।
प्रतिवादीहरू सबैविरुद्ध जनही पाँच करोड पाँच लाख ४२ हजार बिगो कायम गरी मुद्दा दायर गरिएको छ ।
हाल ती जग्गा देवेन्द्रसिंह सैथवार, अमनसिंह सैथवार (नाबालक), तेजप्रतापसिंह सैथवार (नाबालक) रितुकुमारी सैथवार, शिवलाल चमार, प्रदीप सुनार, तेजश्व सोनकर, पूर्णिमाकुमारी बर्मा सुनार र प्रियंककुमारी बर्माको नाममा छ ।
जग्गा हिनामिनामा संलग्नता नदेखिएको, तर जग्गा उनीहरूका नाममा रहेको भन्दै जग्गाधनी (नाबालकबाहेक) विरुद्ध जग्गा जफत गर्ने प्रयोजनका लागि मुद्दा दायर गरिएको छ ।
उक्त जग्गा नेपाल सरकारका नाममा मोहियानी कायम हुनुपर्ने माग दाबी पनि अख्तियारको छ ।