प्रमुख प्रतिपक्षी दल नेपाली कांग्रेसको भ्रातृ संगठन नेपाल विद्यार्थी संघले पेट्रोलियम पदार्थमा गरिएको मूल्यवृद्धि फिर्ता लिन माग गर्दै प्रदर्शन गरेको छ ।
लकडाउनका कारण दैनिक गतिविधि ठप्प हुँदा जनतालाई दैनिकी चलाउन समस्या भइरहेको अवस्थामा मूल्यवृद्धि गर्नु उचित नभएको भन्दै नेविसंघले प्रदर्शन गरेको हो ।
नेपाल आयाल निगमले गरेको मूल्यवृद्धि फिर्ता गर्न माग राख्दै गत बुधबार नेविसंघले ज्ञापनपत्र बुझाएको थियो ।
ज्ञापनपत्र बुझाएपछि शुक्रबार पुनः मूल्यवृद्धि भएपछि नेविसंघ सडकमा उत्रिएको हो । नेविसंघले बबरमहलमा गरेको प्रदर्शनमा सहभागीहरूले विभिन्न नारा लेखिएको प्लेकार्ड बोकेका थिए ।
दैनिक रोजगारी गरेर खाने आमजनताको अवस्था भयावह हुँदै गएको अवस्थामा सरकारले महँगी बढाएर जनताको ढाड भाँच्न थालेपछि यसको विरुद्धमा सडकमा उत्रिनुपरेको नेविसंघ अध्यक्ष राजीव ढुंगानाले बताए ।
सरकारले अहिलेको जटिल अवस्थामा गरिएको मूल्यवृद्धिले जनतालाई ठूलो असर पर्ने भन्दै मूल्यवृद्धिको निर्णय फिर्ता गर्न दबाब दिने उद्देश्यले प्रदर्शन गरेको उनले बताए ।
मूल्यवृद्धि फिर्ता नलिएसम्म आन्दोलन जारी रहने उनको भनाइ छ ।