- वि.सं २०८१ बैशाख ७ शुक्रबार
टेलिभिजन सेवा प्रदायकहरूले भारतीय न्युज च्यानलको नेपालमा प्रसारणमा रोक लगाएका छन् ।
नेपालविरुद्ध भ्रामक प्रचार गरेको तथा ग्राहकले बन्द गर्न आग्रह र दबाब दिएका कारण प्रसारण बन्द गरिएको सेवा प्रदायकहरूले बताएका छन् ।
कूटनीतिक सम्बन्ध नबिग्रियोस् र भ्रम नफैलियोस् भनेर जी न्युजलगायत भारतीय न्युज च्यानल प्रसारण बन्द गरिएको उनीहरूको भनाइ छ ।
टेलिभिजन सेवा प्रदायकहरूले भारतीय न्युज च्यानल बन्द गर्ने सम्बन्धमा सूचना तथा सञ्चार मन्त्रालयमा समेत राय मागेका थिए ।
भ्रम फैलाउने च्यानल बन्द गर्न ग्राहकले दबाब दिएको भन्दै उनीहरूले के गरौँ भनेर सोधेका थिए ।
मन्त्रालयले इच्छाअनुसार गर्न र प्रसारण बन्द गरे पनि आपत्ति नभएको जवाफ दिएको थियो ।
डिस होमका प्रबन्ध निर्देशक सुदीप आचार्यले ग्राहकहरूले भारतीय न्युन च्यानल बन्द गर्न आग्रह गरेका कारण प्रसारण बन्द गरिएको बताए ।
भारतबाट प्रसारण हुने न्युज च्यानलबाहेक अन्य च्यानलहरूको प्रसारणमा भने रोक लगाइएको छैन ।
प्रधानमन्त्री केपी ओली र चिनियाँ राजदूत यान्छीलाई जोडेर जी न्यूजलगायत भारतीय न्यूज च्यानलले भ्रम फैलाएपछि भारतीय मिडियाले पित पत्रकारिता गरेको भन्दै नेपालमा चौतर्फी आलोचना भइरहेको छ ।
सरकारले नेपालको विषयमा अनर्गल प्रचार गर्ने भारतीय सञ्चार माध्यममाथि राजनीतिक र कानुनी उपचार खोज्ने जनाएको छ । सरकारका प्रवक्ता डा. युवराज खतिवडाले दुर्भावना फैलाउने, चरित्र हत्या गर्ने, मानमर्दन गर्ने समाचार तथा विश्लेषणको सरकारले भत्सर्ना गर्ने बताएका छन् ।
नेपाल पत्रकार महासंघले बिहबिार विज्ञप्तिमार्फत भारतीय टेलिभिजनको प्रचार असत्य, भ्रामक र कपोलकल्पित भएको जनाएको छ ।
