कञ्चनपुरको भीमदत्त नगरपालिका– १३ की १४ वर्षीया बालिका नेहा सुनारको शव आज बिहान स्थानीय खोलामा भेटिएको छ । जिल्ला प्रहरी कार्यालय कञ्चनपुरका प्रवक्ता प्रहरी नायब उपरीक्षक अमरबहादुर थापा क्षेत्रीले बुधबार साँझ स्थानीय खोलामा हराएकी बालिका सुनारको शव फेला परेको बताए ।
प्रहरीले बालिकालाई कुटपिट गर्दै खोलामा धकेलेको हुन सक्ने आकलनसहित थप अनुसन्धानका लागि बालिकाका दाजु ३४ वर्षीय भरत सुनारलाई नियन्त्रणमा लिएको छ ।
‘भरतले आवेगमा आएर कुटपिट गर्दै खोलामै धकेलेको जस्तो देखिन्छ,’ क्षेत्रीले भने । उनले घटनाको विस्तृत अनुसन्धान भइरहेको र बालिकाको शव परीक्षणका लागि महाकाली अस्पतालमा राखिएको जानकारी दिए । रासस