ललितपुरको महालक्ष्मी नगरपालिकाका तीनवटा वडामा पूर्ण लकडाउन गरिएको छ ।
नगरपालिकाले वडा नं. ७, ८ र ९ क्षेत्रभित्र औषधि र खाद्यान्न पसलबाहेक सम्पूर्ण उद्योग–व्यवसाय बन्द गर्ने, खाद्यान्न पसल पनि बिहान ९ बजेसम्म मात्रै खोल्न पाइने नियम लागू गरेको छ ।
नगरपालिकाले मास्क लगाउन र दुई मिटरको भौतिक दूरी अनिवार्य पालनाका लागि समेत सूचित गरेको छ ।
मेयर रामेश्वर श्रेष्ठका अनुसार वडा नं. ८ मा कोरोना संक्रमितहरूको संख्या वृद्धि भइरहेकाले थप फैलिन नदिन त्यस क्षेत्रमा कडाइ गरिएको हो ।
नगरपालिकाले स्वास्थ्य संस्थाबाहेकका सबै सरकारी तथा गैरसरकारी कार्यालय, बैंक तथा वित्तीय संस्थाबाट प्रवाह हुने अत्यन्त जरुरी सेवाबाहेक सबै सेवाहरू बन्द गर्ने निर्णय गरेको छ ।
यस्तै, अति आवश्यक कार्यमा बाहेक घरबाहिर ननिस्कने, निस्किनुपर्दा अनिवार्य रूपमा मास्कको प्रयोग गर्ने, एक–अर्कोबीच कम्तीमा एक मिटरको दूरी कायम गर्ने निर्णय गरेको मेयर श्रेष्ठले जानकारी दिए ।
नगरपालिकाको निर्देशनको पालना नगर्नेहरूलाई संक्रामक रोग ऐन, २०२० बमोजिम कारबाही गर्नेसमेत नगरपालिकाले जनाएको छ ।