नाडा अटोमोबाइल्स एसोसिएसनका अध्यक्ष कृष्णप्रसाद दुलालले भन्सार विभागका महानिर्देशक सुमन दाहाललाई भेटी एक्जिम कोड नवीकरणको म्याद थप गर्न आग्रह गरेका छन् । नेपाल उद्योग वाणिज्य महासंघका कार्यकारिणी सदस्य तथा राजस्व समितिका उपसभापतिसमेत रहेका दुलालले एक्जिम कोड नवीकरणको म्याद २०७७ साल असोज मसान्तसम्मका लागि थप गर्न आग्रह गरेका हुन् ।
नेपालमा ३० हजार व्यावसायिक कम्पनीहरू एक्जिम कोडमा दर्ता रहेको र हालसम्म पनि बन्दाबन्दी कायम रहेको, सडकमा जोर–बिजोरका सवारीसाधन सञ्चालनमा रहेको, सर्वोच्च अदालतले जिरो आवरको घोषणा गरेको स्थितिमा नवीकरण कठिन भएको एसोसिएसनले जनाएको छ ।
हाल नवीकरण गर्ने कम्पनीहरू १ हजार ५ सय मात्र रहेको सन्दर्भमा सबै कम्पनीहरूले निर्धारित समयावधिभित्र नवीकरण गर्न नसक्ने उनको भनाइ थियो । एक्जिम कोड नवीकरण गर्ने म्याद असार मसान्तसम्म मात्र रहेको छ ।