कोरोना संक्रमण बढ्दै गएपछि सरकारले घरबाहिर निस्किँदा अनिवार्य रूपमा मास्क लगाउनुपर्ने नियम कडाइका साथ कार्यान्वयन गर्ने भएको छ । गृह मन्त्रालयले मास्क नलगाई घरबाहिर निस्कनेलाई पक्राउ गर्न प्रहरीलाई निर्देशन दिएको छ । संक्रमित व्यक्तिहरू पनि मास्क नलगाई निस्कन सक्ने र उनीहरूबाट संक्रमण फैलन सक्ने भएकाले मास्क नलगाउनेलाई पक्राउ गर्न निर्देशन दिइएको गृह मन्त्रालयका सहायक प्रवक्ता उमाकान्त अधिकारीले बताए ।
‘स्वास्थ्यसम्बन्धी प्रोटोकल पालना गर्ने सर्तमा लकडाउन खुकुलो भएको हो,’ उनले भने, ‘तर नियम उल्लंघन बढेपछि संक्रमण फैलने जोखिम बढेको छ, त्यही भएर कडाइ गरिएको हो । नियम उल्लंघन गर्नेलाई संक्रामक रोग ऐनअनुसार कारबाही गर्न परिपत्र भएको छ ।’
केही दिनयता आन्तरिक संक्रमण बढेपछि स्वास्थ्यसम्बन्धी प्रोटोकल पालनामा कडाइ गर्न लागिएको हो ।