बनगाड कुपिण्डे नगरपालिकास्थित एक क्वारेन्टाइनबाट ७० जना भागेका छन् । क्वारेन्टाइनमा बसेको महिना दिन पुगिसक्दा पनि पिसिआर रिपाेर्ट नआएपछि उनीहरू क्वारेन्टाइनबाट हिँडेका हुन् ।
नगरपालिकाको वडा नम्बर ३ स्थित आधारभूत विद्यालय लहाघाटमा बस्दै आएका ७३ मध्ये ७० जना घर गएका हुन् । उनीहरूले प्रहरीहरूलाई ढुंगामुढा गरेर भागेको नगरपालिकाका मेयर गोविन्दकुमार पुनले बताए । उनीहरू १९ जेठदेखि सोही क्वारेन्टाइनमा बस्दै आएका थिए । क्वारेन्टाइनमा बसेको १७ दिनपछि उनीहरूको स्वाब संकलन गरी प्रादेशिक अस्पताल सुर्खेत पठाइएको थियो । आरडिटी परीक्षणमा उनीहरूमा पोजेटिभ देखिएपछि पिसिआर परीक्षणका लागि स्वाब संकलन गरिएको थियो । मेयर पुनका अनुसार सुर्खेत पठाएको स्वाब त्यहाँ मेसिन बिग्रिएपछि नेपालगन्ज पठाइएको बताए । नेपालगन्जले पनि आजभोलि परीक्षणमा आलटाल गरेको उनको भनाइ छ ।
प्रदेश सरकारले एउटा गतिलो पिसिआर मेसिनसमेत व्यवस्थापन गर्न नसक्दा सर्वसाधारणले सास्ती खेप्नुपरेको उनले गुनासो गरे । बनगाड कुपिण्डे नगरपालिकामा मात्रै यस अवधिमा भारतबाट आएका २५ सय नागरिकलाई क्वारेन्टाइनमा व्यवस्थापन गरिएको थियो । तर, अहिले क्वारेन्टाइनमा एक सयको हाराहारीमा मात्रै छन् । क्वारेन्टाइनबाट भागेकाहरूको खोजी भइरहेको मेयर पुनले बताए ।