खानेपानी, सिँचाइ तथा ऊर्जा विकास कार्यालय दैलेखका निमित्त कार्यालय प्रमुख (इन्जिनियर) टोपेन्द्रसुन्दर मल्लसहित चारजनालाई अख्तियार दुरुपयोग अनुसन्धान आयोग सुर्खेतको टोलीले घुससहित नियन्त्रणमा लिएको छ । 

भगवतीमाई गाउँपालिका– ३ सानटडा खोला तटबन्धन निर्माण सम्पन्न भएपश्चात् भुक्तानीमा सहजीकरण गरिदिने भनी खानेपानी, सिँचाइ तथा ऊर्जा विकास कार्यालय दैलेखका निमित्त कार्यालय प्रमुख मल्ल र सबइन्जिनियर वीरेन्द्र चन्दले सेवाग्राहीसँग घुस रकम माग गरेको भन्ने उजुरीका आधारमा खटिएको अख्तियारको टोलीले उनीहरूलाई रंगेहात पक्राउ गरेको हो ।

निमित्त कार्यालय प्रमुख (इन्जिनियर) मल्ललाई कार्यालय परिसरबाट र सबइन्जिनियर वीरेन्द्र चन्दलाई खटिएको कार्यस्थलबाट नियन्त्रणमा लिएर खानतलासी गरिएको थियो । मल्लको आवासबाट दुई लाख ४१ हजार १६ रुपैयाँ बरामद भएको अख्तियारद्वारा जारी विज्ञप्तिमा उल्लेख छ । 

थप अनुसन्धानको सिलसिलामा सबइन्जिनियर रन्जित श्रेष्ठ र सुरपभाइजर लक्ष्मी पाण्डेसमेत चारैजनालाई मंगलबार नियन्त्रण लिई अनुसन्धान भइरहेको अख्तियार कार्यालय सुर्खेतका प्रवक्ता प्रदीपकुमार कोइरालाले जानकारी दिए ।