क्वारेन्टाइन अवधि १४ दिन, पिसिआर रिपोर्ट १८ दिनमा
भारतबाट स्वदेश फर्किएका कञ्चनपुरको महाकाली नगरपालिका क्षेत्रका दुई महिलासहित १३ जनामा कोरोना पुष्टि भएको छ । राष्ट्रिय जनस्वास्थ्य प्रयोगाशाला टेकुमा गरिएको परीक्षणमा महाकाली नगरका १३ जना स्थानीयमा कोरोना पुष्टि भएको हो । दुई महिलासहित सबैजना भारतबाट आएका व्यक्तिहरू रहेको नगरपालिकाले जनाएको छ ।
महाकाली नगरका प्रवक्ता दिलबहादुर सिजालीले आरडिटी परीक्षणमा कोरोना पोजेटिभ देखिएका उनीहरूको पिसिआर विधिबाट कोरोना परीक्षणका लागि स्वाब नमुना संकलन गरिएको बताए । ‘२८ जेठमा उनीहरूको स्वाब नमुना संकलन गरेर पठाएका थियौँ,’ ‘प्रवक्ता सिजालीले भने, ‘करिब तीन साता पुग्नै लाग्दा रिपोर्ट आयो ।’
कतिपय क्वारेन्टाइनबाट घर पठाइएका छन् । कतिपय क्वारेन्टाइनमै रहेको बताउँदै प्रवक्ता सिजालीले ढिला गरी रिपोर्ट आउँदा समस्या भएको बताए । ढिलागरी रिपोर्ट आउँदा संक्रमण फैलिने खतरा रहेको उनले बताए । संक्रमण देखिएका सबैको स्वास्थ्य सामान्य रहेको बताउँदै उनले उपचारका लागि महाकाली अस्पताल लैजाने तयारी भइरहेको बताए ।