विश्व बैंकले दिने १२ अर्ब रुपैयाँको सहुलियत ऋणको सम्झौतामा हस्ताक्षर
विश्व बैंकले दिने करिब १२ अर्ब रुपैयाँबराबरको सहुलियत ऋण सहायताका लागि सम्झौतापत्रमा हस्ताक्षर भएको छ ।
ऊर्जा क्षेत्रमा लगानी बढाउन र कार्यकुशलता अभिवृद्धिका लागि विश्व बैंक समूहको अन्तर्राष्ट्रिय विकास संस्था आइडिएले दिने १२ अर्ब रुपैयाँ सहुलियत ऋण सहायताका लागि हस्ताक्षर भएको हो । नेपालका तर्फबाट अर्थ मन्त्रालयका सचिव शिशिरकुमार ढुंगाना र बैंकका देशीय निर्देशक फारिस हाजाडजेर्भोसले सम्झौतापत्रमा हस्ताक्षर गरेका छन् ।
कोरोना संकटविरुद्ध लड्न र विद्युत् क्षेत्रका लागि विश्व बैंकले ऋण सहयोग गरेको हो । प्राप्त ऋण सहायताले नेपालमा भरपर्दो र दिगो विद्युतले गरिबी न्यूनीकरणमा सहयोग पुग्ने विश्वास लिइएको छ । विश्व बैंकले डेभलभमेन्ट पोलिसी क्रेडिटअन्तर्गत नेपाललाई सहयोग गर्दै आएको छ ।