Skip This
अविरल वर्षासँगै आएको बाढीले रसुवाको टिमुरेमा निर्माणाधीन सुक्खा बन्दरगाहमा रहेको एउटा टिपर, एउटा जेसिभी र एउटा लोडर बगाएको छ ।
वर्षासँगै आएको बाढीले सुक्खा बन्दरगाह निर्माणका लागि प्रयोग गरिएका ती साधनहरू बगाएको सशस्त्र प्रहरीको २१ नम्बर गुल्म टिमुरेका डिएसपी लक्ष्मण थापाले बताए ।
बाढीको जोखिममा रहेका सुक्खा बन्दरगाहका अन्य ६ वटा सवारीसाधनलाई भने सुरक्षित स्थानमा सारिएको उनले बताए ।
त्यस्तै बन्दरगाह निर्माणका लागि कामदार बस्दै आएको आवासमा समेत बाढीले क्षति पुऱ्याएको थापाले बताए ।
कामदार बस्ने घरको पछिल्लोपट्टिको छेउ पानीको छालले हान्दा भत्किएको छ ।
११ जना कामदारलाई राति नै सुरक्षित ठाउँमा सारेको र सुक्खा बन्दरगाह बाढीको उच्च जोखिममा परेको उनले बताए ।
त्यस्तै सुक्खा बन्दरगाहनजिकै रसुवागढी जलविद्युत् आयोजनामा जाने पुलमा समेत बाढीले क्षति गरेको थापाले बताए ।
उनले पुलको छेउछेउको भाग सबै भत्काएर बीचको भाग मात्र बाँकी रहेको जानकारी दिए ।
