श्रीमानलाई आरडिटी नेगेटिभ देखिएको ११ दिनपछि श्रीमतीमा कोरोना संक्रमणको पुष्टि भएको छ । गुल्मी दरबार गाउँपालिकाकी २१ वर्षीया महिलामा शनिबार कोरोना संक्रमणको पुष्टि भएको स्वास्थ्य कार्यालय गुल्मीका सूचना अधिकारी पशुपति आचार्यले जानकारी दिए ।
गर्भवतीसमेत रहेकी उनलाई गाउँमा सुत्केरी बेथाले च्यापेपछि गुल्मी अस्पताल ल्याइएको थियो । श्रीमान् भारतबाट आएकाले गुल्मी अस्पतालले पहिला उनको आरडिटी परीक्षण गरिएकाे थियाे । परीक्षणपछि आरडिटी रिपोर्ट पोजेटिभ आएपछि उनलाई पाल्पा रिफर गरिएको सूचना अधिकारी आचार्यले बताए ।
शुक्रबार पाल्पाकाे लुम्बिनी मेडिकल कलेज प्रभासमा उनी सुत्केरी भएकी छिन् । महिला र नवजात शिशुको अवस्था सामान्य रहेको अस्पतालले जनाएको छ ।
लुम्बिनी मेडिकल कलेज प्रभासबाट स्वाब संकलन गरेर भैरहवा पठाएकोमा ती महिलाको शनिबार पिसिआर रिपोर्ट पनि पोजेटिभ आएको छ । भर्खर जन्मिएकी नवजात शिशु र आमाको सम्पर्कमा रहेका घरपरिवारको पिसिआर परीक्षणको तयारी भइरहेको गुल्मी दरबार गाउँपालिकाका स्वास्थ्य संयोजक नारायण अर्यालले जानकारी दिए ।
संक्रमित महिलाका श्रीमान् भारतबाट जेठ ११ गते गाउँ आएका थिए । १४ दिन क्वारेन्टाइनमा बसेपछि जेठ २७ गते आरडिटी नेगेटिभ आएकाले उनलाई घर पठाइएको गुल्मी दरबार गाउँपालिकाका स्वास्थ्य संयोजक अर्यालले जानकारी दिए।
अहिलेसम्म गुल्मी दरबार गाउँपालिकामा २१ जनामा कोरोना संक्रमणको पुष्टि भएको छ । ४२ जनामा आरडिटी पोजेटिभ देखिएको छ भने ४९ जनाको पिसिआर रिपोर्ट आउन बाँकी रहेको गाउँपालिकाले जनाएको छ । गुल्मीमा अहिलेसम्म एक सय ७४ जनाको कोरोना संक्रमणको पुष्टि भएको स्वास्थ्य कार्यालय गुल्मीले जनाएको छ ।