सरकारले नेपाल–भारत सीमा सम्बन्धमा प्रमाण संकलनका लागि विष्णुराज उप्रेतीको संयोजकत्वमा नौ सदस्य रहेको समिति गठन गरेको छ । बुधबार बसेको मन्त्रिपरिषद् बैठकले गठन गरेको समितिले नेपाल–भारतबीचका सन्धि, सम्झौता र समझदारीपत्र, तत्कालीन इस्टइन्डिया कम्पनी ब्रिटिस सरकार र भारत सरकारसँग भएका पत्रचारहरूको सक्कल कागजात र नभए प्रतिलिपि खोज्ने सरकारका प्रवक्ता डा. युवराज खतिवडाले जानकारी दिए ।
यस्तै सार्वजनिक निकायलगायत विभिन्न संघसंस्था, व्यक्ति, स्वदेशी तथा विदेश पुस्तकालय एवं अभिलेखालयबाट सीमा क्षेत्रसँग सम्बन्धित सरकारी प्रतिवेदन, आदेश, प्रकाशन, सरकारका योजनालगायतका सरकारी दस्ताबेज पनि खोज्नेछ ।
अदालती फैसला, जग्गाको स्वामित्वको प्रमाणपत्र एवं राजस्व, मालपोत, भूमिकर, तिरोभरो आदि तिरेका रसिद, भर्पाइ पत्र वा आदेशको पनि खोजबिन गर्नेछ ।