- वि.सं २०८१ बैशाख १३ बिहीबार
समाजवादी पार्टीकी सांसद सरिता गिरीलाई संविधान संशोधन विधेयक खारेजको माग गर्दै दर्ता गरेको प्रस्ताव फिर्ता लिन उनको पार्टीले निर्देशन दिएको छ । समाजवादीले सरकारी विधेयकको समर्थन गरेको छ भने असन्तुष्ट सांसद गिरीले बुधबार संशोधन प्रस्ताव दर्ता गरेकी हुन् ।
कालापानी, लिपुलेक, लिम्पियाधुरा समेटिएको नयाँ नक्सासहितको निसान छाप राख्न सरकारले ल्याएको संविधान संशोधन विधेयकमा तथ्य र प्रमाण नपुगेकाले संशोधन प्रस्ताव दर्ता गर्नुपरेको गिरीको दाबी छ ।
पार्टीका प्रमुख सचेतक उमाशंकर अरगरियाले विज्ञप्ति जारी गर्दै प्रस्ताव फिर्ता लिन निर्देशन दिएका हुन् । उनले संशोधन प्रस्ताव फिर्ता नलिए कारबाही गर्ने चेतावनी दिएका छन् ।
यसैबीच, सत्तारुढ दल नेपाल कम्युनिस्ट पार्टी (नेकपा) को युवा संगठन राष्ट्रिय युवा संघ र प्रमुख प्रतिपक्षी दल कांग्रेसको युवा संगठन नेपाल तरुण दलले छुट्टाछुट्टै विज्ञप्ति जारी गरी गिरीलाई कारबाहीको माग गरेका छन् ।
