अत्यावश्यक घरायसी सामग्रीको होम डेलिभरी गर्दै आएको अनलाइन सपिङ ग्यापु डटकम(gyapu.com) र अग्रणी किराना तथा डिपार्टमेन्ट चेन सेल्सबेरीबीच व्यापार साझेदारी सुरु भएको छ ।
काठमाडौं, बनेपा र पोखराका २३ आउटलेटमार्फत सेवा दिइरहेको सेल्सबेरीमा उपलब्ध एक हजार चार सयभन्दा धेरै घरायसी सामान ग्राहकले ग्यापु डटकमको वेबसाइट वा मोबाइल एपमार्फत अर्डर गर्न सक्नेछन् ।
उक्त अर्डरको ग्यापुका कर्मचारीमार्फत २४ घन्टाभित्र नि:शुल्क डेलिभरी गरिने बताइएको छ ।
ग्राहकले डेलिभरीपूर्व ई–सेवाबाट पैसा तिरी क्यासब्याकसमेत लिन सक्नेछन् । ग्राहकले कुनै पनि राष्ट्रिय वा अन्तर्राष्ट्रिय बैंक कार्डहरू, आइएमई पे, फोने पे, कनेक्ट आइपिएस, खल्ती, प्रभु पेमार्फत बिल तिर्न सक्छन् भने डेलिभरीको समयमा नगदसमेत दिन सक्नेछन् ।
हाल काठमाडौं उपत्यकाभित्र मात्र ग्यापुको सेवा रहेको छ भने लकडाउनपछि आफ्नो सेवा देशका मुख्य सहरहरूमा विस्तार गरिने ग्यापु डटकमका निर्देशक ज्ञानेन्द्र खड्काले बताए ।